16. สาริปุตฺตสุตฺตํ
[961]
‘‘น เม ทิฏฺโฐ อิโต ปุพฺเพ, (อิจฺจายสฺมา สาริปุตฺโต)
น สุโต อุท กสฺสจิ;
เอวํ วคฺคุวโท สตฺถา,
ตุสิตา คณิมาคโตฯ
[962]
‘‘สเทวกสฺส โลกสฺส, ยถา ทิสฺสติ จกฺขุมา;
สพฺพํ ตมํ วิโนเทตฺวา, เอโกว รติมชฺฌคาฯ
[963]
‘‘ตํ พุทฺธํ อสิตํ ตาทิํ, อกุหํ คณิมาคตํ;
พหูนมิธ พทฺธานํ, อตฺถิ ปญฺเหน อาคมํฯ
[964]
‘‘ภิกฺขุโน วิชิคุจฺฉโต, ภชโต ริตฺตมาสนํ;
รุกฺขมูลํ สุสานํ วา, ปพฺพตานํ คุหาสุ วาฯ
[965]
‘‘อุจฺจาวเจสุ สยเนสุ, กีวนฺโต ตตฺถ เภรวา;
เยหิ ภิกฺขุ น เวเธยฺย, นิคฺโฆเส สยนาสเนฯ
[966]
‘‘กตี ปริสฺสยา โลเก, คจฺฉโต อคตํ ทิสํ;
เย ภิกฺขุ อภิสมฺภเว, ปนฺตมฺหิ สยนาสเนฯ
[967]
‘‘กฺยาสฺส พฺยปฺปถโย อสฺสุ, กฺยาสฺสสฺสุ อิธ โคจรา;
กานิ สีลพฺพตานาสฺสุ, ปหิตตฺตสฺส ภิกฺขุโนฯ
[968]
‘‘กํ โส สิกฺขํ สมาทาย, เอโกทิ นิปโก สโต;
กมฺมาโร รชตสฺเสว, นิทฺธเม มลมตฺตโน’’ฯ
[969]
‘‘วิชิคุจฺฉมานสฺส ยทิทํ ผาสุ, (สาริปุตฺตาติ ภควา)
ริตฺตาสนํ สยนํ เสวโต เจ;
สมฺโพธิกามสฺส ยถานุธมฺมํ,
ตํ เต ปวกฺขามิ ยถา ปชานํฯ
[970]
‘‘ปญฺจนฺนํ ธีโร ภยานํ น ภาเย, ภิกฺขุ สโต สปริยนฺตจารี;
ฑํสาธิปาตานํ สรีสปานํ, มนุสฺสผสฺสานํ จตุปฺปทานํฯ
[971]
‘‘ปรธมฺมิกานมฺปิ น สนฺตเสยฺย, ทิสฺวาปิ เตสํ พหุเภรวานิ;
อถาปรานิ อภิสมฺภเวยฺย, ปริสฺสยานิ กุสลานุเอสีฯ
[972]
‘‘อาตงฺกผสฺเสน ขุทาย ผุฏฺโฐ, สีตํ อตุณฺหํ [อจฺจุณฺหํ (สี. สฺยา.)] อธิวาสเยยฺย;
โส เตหิ ผุฏฺโฐ พหุธา อโนโก, วีริยํ ปรกฺกมฺมทฬฺหํ กเรยฺยฯ
[973]
‘‘เถยฺยํ น กาเร [น กเรยฺย (สี. สฺยา. ก.)] น มุสา ภเณยฺย, เมตฺตาย ผสฺเส ตสถาวรานิ;
ยทาวิลตฺตํ มนโส วิชญฺญา, กณฺหสฺส ปกฺโขติ วิโนทเยยฺยฯ
[974]
‘‘โกธาติมานสฺส วสํ น คจฺเฉ, มูลมฺปิ เตสํ ปลิขญฺญ ติฏฺเฐ;
อถปฺปิยํ วา ปน อปฺปิยํ วา, อทฺธา ภวนฺโต อภิสมฺภเวยฺยฯ
[975]
‘‘ปญฺญํ ปุรกฺขตฺวา กลฺยาณปีติ, วิกฺขมฺภเย ตานิ ปริสฺสยานิ;
อรติํ สเหถ สยนมฺหิ ปนฺเต, จตุโร สเหถ ปริเทวธมฺเมฯ
[976]
‘‘กิํสู อสิสฺสามิ กุวํ วา [กุธ วา (ก.), กุถ วา (นิทฺเทส)] อสิสฺสํ, ทุกฺขํ วต เสตฺถ กฺวชฺช เสสฺสํ;
เอเต วิตกฺเก ปริเทวเนยฺเย, วินเยถ เสโข อนิเกตจารีฯ
[977]
‘‘อนฺนญฺจ ลทฺธา วสนญฺจ กาเล, มตฺตํ โส ชญฺญา อิธ โตสนตฺถํ;
โส เตสุ คุตฺโต ยตจาริ คาเม, รุสิโตปิ วาจํ ผรุสํ น วชฺชาฯ
[978]
‘‘โอกฺขิตฺตจกฺขุ น จ ปาทโลโล, ฌานานุยุตฺโต พหุชาครสฺส;
อุเปกฺขมารพฺภ สมาหิตตฺโต, ตกฺกาสยํ กุกฺกุจฺจิยูปฉินฺเทฯ
[979]
‘‘จุทิโต วจีภิ สติมาภินนฺเท, สพฺรหฺมจารีสุ ขิลํ ปภินฺเท;
วาจํ ปมุญฺเจ กุสลํ นาติเวลํ, ชนวาทธมฺมาย น เจตเยยฺยฯ
[980]
‘‘อถาปรํ ปญฺจ รชานิ โลเก, เยสํ สตีมา วินยาย สิกฺเข;
รูเปสุ สทฺเทสุ อโถ รเสสุ, คนฺเธสุ ผสฺเสสุ สเหถ ราคํฯ
[981]
‘‘เอเตสุ ธมฺเมสุ วิเนยฺย ฉนฺทํ, ภิกฺขุ สติมา สุวิมุตฺตจิตฺโต;
กาเลน โส สมฺมา ธมฺมํ ปริวีมํสมาโน,
เอโกทิภูโต วิหเน ตมํ โส’’ติฯ
สาริปุตฺตสุตฺตํ โสฬสมํ นิฏฺฐิตํฯ อฏฺฐกวคฺโค จตุตฺโถ
นิฏฺฐิโตฯ
ตสฺสุทฺทานํ –
กามํ คุหญฺจ ทุฏฺฐา จ, สุทฺธญฺจ ปรมา ชรา;
เมตฺเตยฺโย จ ปสูโร จ, มาคณฺฑิ ปุราเภทนํฯ
กลหํ ทฺเว จ พฺยูหานิ [พฺยูหานิ (สี.)], ปุนเทว ตุวฏฺฏกํ;
อตฺตทณฺฑวรํ สุตฺตํ, เถรปุฏฺเฐน [เถรปญฺเหน (สี.), สาริปุตฺเตน (สฺยา.)] โสฬส;
อิติ เอตานิ สุตฺตานิ, สพฺพานฏฺฐกวคฺคิกาติฯ
5. ปารายนวคฺโค